“Koox-hoosaadka Xuquuqda Dadka Gudaha Ku Barakacay ee Madasha Iskaashiga EHRC iyo Ururada Bulshada Rayidka,” taas oo ay si wadajir ah u guddoominayaan Guddiga Xuquuqda Insaanka Itoobiya (EHRC) iyo urur bulshada rayidka ah oo maxalli ah oo la yiraahdo Tomorrow is Better, ayaa 22-kii Sane 2018 T.I. magaalada Addis Ababa ku yeeshay wadahadal ay kaga arrinsanayaan sidii ay u xoojin lahaayeen iskaashigooda wadajirka ah. Madashan waxaa ka qaybgalay ururada bulshada rayidka ah oo ka shaqeeya arrimaha xuquuqda dadka gudaha ku barakacay, qaxootiga, iyo muhaajiriinta, kuwaas oo ka kala yimid Maamulka Magaalada Addis Ababa, iyo Deegaannada Canfarta iyo Amxaarada.
Intii uu socday wadahadalka, waxaa la xusay caqabado dhowr ah oo ay ka mid yihiin in uusan jirin qaab-dhismeed sharci iyo nidaam hay’adeed oo dhameystiran oo ku aaddan maaraynta dadka barakacay, in ay jiraan daldaloolo dhinaca ka hortagga barakaca ah, iyo weliba gabaabsi ku yimid gargaarka bini’aadantinimada iyo caqabadaha ku hor gudban hirgelinta xalalka waara. Dhanka kale, waxaa la falanqeeyay daldaloolada ay la kulmaan qaxootiga iyo magangalyo-doonka marka laga eego dhinacyada diiwaangelinta, bixinta dukumeentiyada, xorriyadda isku socodka, iyo ixtiraamka xaqa shaqada; sidoo kale, waxaa wadahadal ballaaran laga yeeshay xaaladda walaaca dhalisay ee xuquuqda aadanaha ee ay wajahaan muhaajiriinta xuduudaha isaga gudbaya iyaga oo adeegsanaya waddooyin aan rasmi ahayn.
Madasha dhexdeeda, waxaa lagu heshiiyay howlaha ugu waaweyn ee la qorsheeyay in mudnaanta la siiyo si wadajir ahna loo fuliyo sanad miisaaniyadeedka 2019. Sidoo kale, waxaa wadatashi laga sameeyay sidii madasha iskaashiga looga dhigi lahaa mid wax ku ool ah iyo sidii loo abuuri lahaa nidaam macluumaadka si joogto ah layskula wadaago.
Agaasimaha Waaxda Xuquuqda Dadka Gudaha Ku Barakacay, Qaxootiga, iyo Muhaajiriinta ee EHRC, ahna Guddoomiyaha Koox-hoosaadka Dadka Barakacay ee Madasha Iskaashiga, Mihreteab Gebremeskel; ayaa sheegay in ujeeddada laga leeyahay in si habboon loo baahiyo, loo ixtiraamo, loona ilaaliyo xuquuqda dadka gudaha ku barakacay, qaxootiga, iyo muhaajiriinta aan hal hay’ad oo keliya lagu xaqiijin karin. Isagoo xusuusinaya in ururada bulshada rayidka ah ay yihiin la-hawlgalayaasha ugu weyn ee lagu gaari karo ujeedadan; wuxuu intaas ku daray baahida loo qabo in la xoojiyo laguna sii wado madasha iskaashiga si loo xaqiijiyo in shaqooyinka mustaqbalka ee la qorsheeyay in isku duwid lagu fuliyo ay noqdaan kuwa miro dhal ah.