Guddiga Xuquuqda Insaanka ee Itoobiya (EHRC), isagoo kaashanaya Golaha Hay’adaha Diimaha ee Itoobiya, ayaa madal wacyigelin ah ku qabtay magaalada Addis Ababa bisha Sane 4-teeda, 2018 T.I. Barnaamijkan ayaa ujeedkiisu yahay in kor loo qaado wacyiga hoggaamiyeyaasha hay’adaha diimaha ee ku aaddan awoodda iyo mas’uuliyadda EHRC, iyo sidoo kale mabaadi’da la socodka xuquuqda aadanaha, hababka xog-uruurinta, iyo nidaamyada digniinta hore.
Madasha waxaa ka soo qayb galay wakiilo ka socday Kaniisadda Ortodokska Tawaahidoee Itoobiya, Golaha Sare ee Arrimaha Islaamka Itoobiya, Kaniisadda Katooliga ee Itoobiya, Golaha Rumaystayaasha Injiilka, iyo Kaniisadda Adventist-ga ee Maalinta Toddobaad.
Ka soo qayb galayaasha madasha waxay ka wada hadleen la socodka xuquuqda aadanaha, nidaamyada digniinta hore; doorka hay’adaha diimaha ay ku leeyihiin ilaalinta iyo horumarinta xuquuqda aadanaha, iyo sidoo kale sidii hay’adaha diimuhu ay ula shaqayn lahaayeen EHRC si loo xalliyo khataraha xadgudubyada xuquuqda aadanaha loona helo xal waara.
Intaa waxaa dheer, barnaamijku wuxuu abuuray xaalado sahlaya in la dhaqangeliyo Is-afgaradkii (MoU) ay EHRC iyo Golaha Hay’adaha Diimaha ee Itoobiya ku kala saxiixdeen magaalada Jimma bisha Yekatit 19-keeda, 2018 T.I., kaas oo ku saabsanaa in si wadajir ah looga shaqeeyo ilaalinta xuquuqda insaanka iyo dhismaha nabadda.
Ku-xigeenka Xoghayaha Guud ee Golaha Hay’adaha Diimaha ee Itoobiya, Xaaji Mascuud Aadam, ayaa caddeeyay in mas’uuliyadda sugidda xuquuqda aadanaha ay tahay mid waajib ku ah qof kasta, wuxuuna xaqiijiyay in Goluhu uu diyaar u yahay inuu la shaqeeyo EHRC si loo horumariyo xaaladda xuquuqda aadanaha ee dalka.
Ku-xigeenka Madaxa Komishineerka EHRC, Dr. Mizaane Abaate, ayaa xusay in doorka hay’adaha diimaha ay ku leeyihiin sugidda xuquuqda aadanaha uu yahay mid aad u sarreeya, isagoo sheegay in loo baahan yahay in mustaqbalka si wadajir ah looga shaqeeyo wacyigelinta iyo waxbarashada xuquuqda aadanaha, iyo sidoo kale digniinta hore ee xuquuqda aadanaha.