የኢትዮጵያ ሰብአዊ መብቶች ኮሚሽን (ኢሰመኮ) የሴቶች እና ህፃናት መብቶች ኮሚሽነር አሸነፈች አበበ የመሩት ልዑክ ቡድን ከጥቅምት 3 እስከ ጥቅምት 10 ቀን 2019 ዓ.ም. በሌሶቶ ማሴሩ እየተካሄደ በሚገኘው 48ኛው የአፍሪካ ህፃናት መብቶች እና ደህንነት ባለሙያዎች ኮሚቴ (ACERWC) መደበኛ ስብሰባ ላይ በመሳተፍ ላይ ይገኛል።
በጉባኤው ወቅት ቡድኑ በአህጉራዊ ውይይቶች ላይ በመገኘት በሴቶች እና ህፃናት መብቶች አጠባበቅ፣ በልዩ ጥበቃና እንክብካቤ አውዶች እንዲሁም አጠቃላይ የሰብአዊ መብቶች አከባበር ዙሪያ የተከናወኑ ተቋማዊ ተግባራትንና የምልከታ ውጤቶችን አቅርቧል።
የሴቶች እና ህፃናት መብቶች ኮሚሽነር አሸነፈች በመድረኩ ባደረጉት ገለጻ፣ ተቋሙ ከአህጉራዊ እና ቀጣናዊ የሰብአዊ መብቶች አሰራሮች ጋር በመቀናጀት የሴቶችና ህፃናት መብቶች በተገቢው ሁኔታ መከበራቸውን ለማረጋገጥ የሚያደርገውን የክትትል እና የውትወታ ስራዎች አጠናክሮ እንደሚቀጥል አረጋግጠዋል።
በተጨማሪም ኮሚሽነሯ በሀገር አቀፍ ደረጃ የህፃናትና ሴቶች መብቶችን ለማስከበር የተከናወኑ ተቋማዊ እርምጃዎችን በዝርዝር አብራርተዋል።
በመጨረሻም ቡድኑ በ48ኛው ጉባኤ ወቅት የተነሱ ሀሳቦችንና የተለዩ ልምዶችን መሰረት በማድረግ ተቋማዊ የፖሊሲ እና የምክረ-ሀሳብ ሰነዶችን አዘጋጅቶ ለሚመለከታቸው አካላት እንደሚያደርስ ገልጸዋል።
ቡድኑ ኦክቶበር 14/2026 እ.ኤ.አ የአፍሪካ ብሄራዊ የሰብአዊ መብቶች ተቋማት ኔትወርክ (NANHRI) “የብሄራዊ ሰብአዊ መብቶች ተቋማት የአፍሪካ ህፃናት መብቶች እና ደህንነት ባለሙያዎች ኮሚቴ ውሳኔዎችን በማስፈጸም በኩል ያላቸውን ሚና ማጠናከር” በሚል ርዕስ በሚያዘጋጀው ጎንዮሽ መድረክ ላይም የሚሳተፍ ይሆናል።
በዚህ አህጉራዊ ስብሰባ ወቅት ኮሚቴው በዲጂታል አማራጮች የሚፈጸሙ በህፃናት ላይ የሚደርሱ ጥቃቶችን መከላከል፣ በአፍሪካ የህፃናት መብቶች እና ደህንነት ቻርተር አንቀጽ 13 ስለ አካል ጉዳተኛ ህፃናት መብቶች የተዘጋጀውን ረቂቅ አጠቃላይ አስተያየት፣ እንዲሁም ህፃናትን ለታጣቂነት መመልመል ዙሪያ የተደረጉ ጥናቶችን የሚመለከቱ ውይይቶችን ያካሂዳል።